Duk da cewa lashe wannan kofi a karo na 25 babbar nasara ce ga Bayern Munich, a hannu guda rashin wannan dama na iya zama babbar asara ga kulaf din, kwanaki kadan da lashe kofin na bana, magoya baya, da kuma shi kan sa kulaf din basu gudanar da wani biki na nuna farin cikin su ba.
Wannan nasara dai ta tabbata ne, bayan da Bayern Munich din ta doke Hertha BSC da ci daya da nema, a wasan da suka buga ranar Asabar. Bayern Munich dai ta lashe wannan kofi a karon farko cikin shekara ta 1932.
An kuma tabbatar da nasarar Bayern din bayan kulaf din dake biye da ita a matsayi na biyu VfL Wolfsburg, ya rasa nasara a wasan sa da Borussia Moenchengladbach a ranar Asabar.
Ana dai danganta rashin fara bukukuwa a bangaren Bayern, da dakon manyan wasannin da ke gabanta, wato wasan kusa da na karshe a gasar cin kofin zakarun turai, wanda za ta buga da Barcelona a ranekun 6, da kuma 12 ga watan Mayu mai zuwa.
Don haka a cewar kocin kulaf din Pep Guardiola, lokaci bai yi ba da zasu fara murna tunkuna. A ganin sa nasarar kulaf din za ta cika ne kadai, idan har suka dauki kofin zakarun turai dake daf da kammala.(Saminu Alhassan)
