Gamayyar tattalin arzkin kasashen yammacin Afrika (ECOWAS) ta yi allawadai a ranar Jumma'a kan kisa, cin zarafi da kuma kyamar baki 'yan kasashen Afrika da ba su ji ba su gani ba a kasar Afrika ta Kudu.
A cikin wata sanarwar da aka sanya wa hannu a ranar Jumma'a, shugaban kungiyar ECOWAS, kuma shugaban kasar Ghana John Dramani Mahama ya bukaci gwamnatin Afrika ta Kudu da ta dauki matakan da suka wajaba domin kawo karshen hare haren kyamar baki dake ci gaba da karuwa a fadin kasar. Ya yi allawadai da cewa mutanen kasashe daban daban da suka sadaukar da rayukansu domin taimakawa 'yan kasar Afrika ta Kudu wajen yaki, kawar da kuma samun nasara kan wariyar launin fata, su ne a yanzu aka maida matsayin baki kuma ake ma kisan wulakanci. (Maman Ada)
