Bisa kididdigar da hukumar kwastam ta Sin ta bayar a yau Litinin ranar 13 ga wata, an ce, a farkon watanni 3 na bana, yawan kudin da Sin ta samu wajen shige da ficen kayayyaki ya kai RMB biliyan 5540, abin da ya rage da kashi 6 cikin 100. Yayin da yawan kudin da Sin ta samu wajen fitar da kayayyaki ya karu da kashi 4.9 cikin 100, kudin da Sin ta samu wajen shigar da kayayyaki ya ragu da kashi 17.3 cikin 100, ke nan Sin ta samu gibin ciniki da yawansa ya kai RMB biliyan 755.33, abin da ya karu har sama da sau 6.

A gun taron manema labaru na majalisar gudanarwa da aka yi a wannan rana, kakakin hukumar kwastam ta Sin Huang Songping ya yi nazari, inda ya bayyana cewa, har yanzu, ana kokarin daidaita tattalin arzikin duniya bayan da aka samu rikicin kudi, wanda ya sa ba a farfado da tattalin arziki sosai ba, kuma da kyar za'a iya warware wannan batu gaba daya. A sa'i daya kuma, akwai yiwuwar koma bayan tattalin arzikin kasar Sin, yawan kudin da Sin ta samu wajen shige da ficen kayayyaki ya ragu, amma ingancin cinikin da Sin ta yi da kasashen waje ya samu kyautatuwa.

Mr. Huang ya yi nuni da cewa, duk da cewa, kasar Sin ta samu babban ci gaba wajen kyautata ingancin cinikin da ta yi da kasashen waje, tare da kyautata tsarin yin ciniki, sai dai har yanzu Sin na fuskantar matsaloli da dama wajen raya sha'anin cinikayya da kasashen waje.(Bako)