Bisa labarin da kamfanin dillancin labaru na Xinhua ya bayar daga garin Garissa dake arewa maso gabashin kasar Kenya, an ce, yawan mutanen da suka rasu ya karu zuwa 15, baya ga wasu mutane 65 suka jikkata, sakamakon wani harin da aka kai wata jami'ar kasar Kenya dake garin na Garissa.

Mr. Adan Duale, shugaban masu rinjaye a majalisar dokokin kasar Kenya ya tabbatar da wannan adadi, inda ya kara da cewa, har yanzu rundunar kwantar da tarzoma ta kasar na aikin ceton sauran daliban da aka ritsa yayin harin.

An labarta cewa, kungiyar Al-Shabaab ta kasar Somaliya ce ta kaddamar da wannan hari. Tuni dai kungiyar ta bayyana cewar ta riga ta hallaka dalibai da dama 'yan Kenyan, kuma za ta ci gaba da kai hari kan 'yan Kenya dake jami'ar, cikin wani sako da ta fitar ta kafar rediyon ta. (Sanusi Chen)