Babban magatakardar MDD Ban Ki-moon, ya fidda wata sanarwa ta hannun kakakinsa, dake Allah wadai da harin da aka kai kan fararen hula a kauyen Kormey mai makwabtaka da birnin Mandera, yana mai kira da a kame, tare da hukunta wadanda suka aikata wannan ta'asa.

Sanarwar wadda ke kunshe da sakon jaje ga iyalan wadanda harin ya ritsa da su, da ma gwamnatin kasar, da daukacin jama'arta, ta kuma jaddada aniyar MDD, ta goyon bayan kasar Kenya a yakin da take yi da ta'addanci. Kana ta yi fatan cimma nasarar kai wa ga tabbatar da tsaron rayukan al'umma bisa dokokin duniya da na kasar.

Rundunar 'yan sanda a Kenya dai ta ce wasu dakaru ne suka bude wuta kan wasu ma'aikatan dake fasa duwatsu, a yankin Mandera dake arewacin kasar ta Kenya, lamarin da ya haddasa rasuwar ma'aikatan a kalla 36.

'Yan sandan sun kuma zargi mayakan kungiyar Al-Shabaab na kasar Somaliya da aikata wannan ta'asa. (Zainab)