A ranar Talata 2 ga wata, aka shiga kwana na biyu na taron sauyin yanayi na MDD a birnin Lima, inda wakilan kungiyar EU suka jaddada cewa, idan ana son cimma sabuwar yarjejeniyar tinkarar sauyin yanayi bayan shekara ta 2020 a gun taron sauyin yanayi na MDD da za a gudanar a birnin Paris a karshen badi, ya kamata a cimma daidaito a gun taron Lima.

Babbar wakiliyar yin shawarwari ta kwamitin kungiyar EU Elina Bardram ta bayyana cewa, taron Lima zai zama muhimmin taro kafin taron Paris, don haka kungiyar EU tana fatan za a samu sakamako mai amfani a taron Lima.

Elina ta bayyana cewa, ana bukatar a warware matsaloli da dama a cikin makwanni biyu masu zuwa, sai dai kuma halin tinkarar sauyin yanayi da ake ciki a duniya ya kyautata. Ta ce, kungiyar EU ta zartas da wasu yarjejeniyoyin tsarin yanayi da makamashi na shekarar 2030 a watan Oktoba na bana, haka kuma kasashen Sin da Amurka sun gabatar da hadaddiyar sanarwar tinkarar sauyin yanayi a watan Nuwanba, matakan da suka nuna alama ga sauran kasashen duniya, wadanda za su sa kaimi gare su da gabatar da shirye-shiryensu a wannan fanni kafin taron Paris. (Zainab)