Kungiyar sa kaimi ga bunkasuwar ciniki ta kasar Sin ta bayyana a ranar 30 ga wata a nan birnin Beijing cewa, shugaban kasar Sin Xi Jinping zai halarci bikin bude taron koli na shugabannin membobin kungiyar APEC kan batun masana'antu da cinikayya tare da gabatar da jawabi. Mataimakin shugaban kungiyar kuma mataimakin shugaban kwamitin shirya taron kolin Yu Ping, ya sanar da hakan a gun taron manema labaru game da taron.

Yu Ping ya yi bayani cewa, za a gudanar da taron koli na shugabannin membobin kungiyar APEC kan batun masana'antu da cinikayyar ne tun daga ranar 9 zuwa 11 ga watan Nuwanbar dake tafe a nan birnin Beijing. Ya zuwa yanzu, shugabannin kasashen Amurka, New Zealand, Chile, Peru, Indonesia, yankin Hongkong na kasar Sin da sauran kasashe da yankuna sun tabbatar da aniyarsu ta halartar taron kolin. (Zainab)