Sakamakon kusantar wa'adin shawarwari kan batun nukiliya na kasar Iran da aka tsara a watan Nuwamba, ana ta mai da hankali kan ci gaban da za a samu a gun shawarwarin na wannan karo. Shugaban kasar Iran Hassan Rohani ya bayyana a ranar 27 ga wata cewa, idan kasashen yammacin duniya na iya nuna sahihancinsu, to ana sa ran cimma yarjejeniya cikin lokaci a tsakanin bangarori daban daban masu halartar shawarwarin.

Gidan talebijin na kasar Iran ya bayyana cewa, shugaba Rohani ya fadi hakan ne yayin da yake ganawa da jakadan kasar Norway dake kasar Iran Odyssey Norheima a wannan rana.

Amma a sa' daya kuma shugaba Rohani ya jaddada cewa, shirin nukiliya da kasar Iran ke gudanarwa bai sabawa yarjejeniyar hana yaduwar makaman nukiliya ba. Kana tana gudanar da shi ne a karkashin sanya idon da hukumar IAEA ta yi. Sa'an nan ya nanata cewa, kasarsa na da hakkin yin amfani da makamashin nukiliya cikin zaman lafiya.

Bugu da kari, kamfanin dillancin labaru na kasar Iran IRNA ya ruwaito mamban tawagar Iran a shawarwarin yana cewa, labarin da aka bayar cewa wai Iran tana duba yiwuwar tsawaita lokacin yin shawarwarin ba gaskiya ba ne. Ya ce, a halin yanzu, bangarori daban daban suna nuna sahihanci ga shawarwarin, kana suna fatan za a kammala shawarwarin kafin ranar 24 ga watan Nuwanba. (Zainab)