141016-Murtala.m4a

Kungiyar wasan kwallon kafa ta Najeriya wato NFF a takaice ta sanar da korar babban kocin kungiyar Super Eagles Stephen Keshi daga aikinsa a yau Alhamis.

Bayan da Najeriya ta doke Sudan da ci 3 da 1 wadda aka yi jiya a Abuja, babban birnin tarayya, kwamitin zartaswa na kungiyar NFF ya kira wani taro a otel din Transcorp Hilton dake birnin tun daren jiya har zuwa yau da safe, inda ta nada tsohon kocin kungiyar Shu'aibu Amodu a matsayin kocin rikon-kwarya, wanda zai jagoranci kungiyar Super Eagles don buga sauran wasannin dake neman gurbi a gasar cin kofin nahiyar Afirka na shekara ta 2015.

Koda yake Najeriya ta doke Sudan jiya a Abuja, amma tana matsayi na karshe a cikin rukunin A, inda a baya ta sha kaye a hannun Kongo da Sudan, da kuma yin kunnen doki da Afirka ta Kudu, lamarin da ya sa ake sukar Stephen Keshi da neman saukar da shi daga mukamin babban kocin kungiyar Super Eagles. (Murtala)