Kaza lika babban magatakardan MDDr ya kalubalanci bangarori 2 na Sudan ta Kudun dake arangama da juna, da su tsagaita bude wuta bisa yarjejeniyar da suka kulla ba tare da bata lokaci ba.
Cikin sanarwar da ya fitar ta hannun kakakinsa mista Ban ya lura da yadda gwamnatin kasar Sudan ta Kudu, da dakaru masu adawa da ita suka cimma sabuwar yarjejeniyar tsagaita bude wuta a ranar 23 ga watan Janairun bana. Game da hakan mista Ban ya yi kira da a aiwatar da wannan yarjejeniya nan take, tare da cika alkawarin da aka dauka na kafa gwamnatin gambiza ta wucin gadi.
Har wa yau sanarwar ta hakaito mista Ban na yabawa kokarin da shugabannin kungiyar IGAD da manzon musamman na kungiyar, bisa kokarin warware rikicin Sudan ta Kudu cikin ruwan sanyi, yana mai jaddada aniyyar MDD ta baiwa hakan cikakken goyon baya. (Bello Wang)
