Babban magatakardar MDD Ban Ki-moon, ya fidda wata sanarwa a kasar Qatar, inda ya yi tir da hare-haren da kasar Isra'ila ke kaiwa ta kasa a zirin Gaza, hare-haren da suka haddasa asarar rayuka da jikkatar fararen hula da dama. Mr. Ban ya fidda wannan sanarwa ne a jiya Lahadi lokacin da yake gudanar da ziyarar aiki a kasar ta Qatar.
A kuma wannan rana ita ma kakakin ofishin hukumar harkokin wajen kasar Amurka Jen Psaki, ta ce babban sakataren harkokin wajen Amurkan John Kerry zai halarci birnin Alkahira na kasar Masar a Litinin din nan, domin gudanar da shawarwari da masu ruwa da tsaki kan rikicin da ke wakana tsakanin Isra'ila da Palesdinu. (Kande Gao)
