A ci gaba da buga wasannin cin kofin duniya dake gudana a kasar Brazil, kasar Sifaniya wadda kuma ke rike da kambin gasar ta kwashi kashinta a hannu, bayan da kasar Holland ta lallasa ta da ci 5 da 1, a wasan farko da kungiyoyin suka buga a jiya Jumma'a.

Yayin wasan na birnin Salvador, wanda shi ne na farko ga kungiyoyin biyu a rukuninsu na B, 'yan wasan Holland Robben da Van Persie sun ci wa kungiyarsu kwallaye biyu-biyu, a wani yanayi da ya yi kama da ramuwar gayyar lashe Holland din da Sifaniya ta yi da ci daya da nema, yayin wasan karshe na cin kofin duniyar da ya gabata a shekarar 2010 a Afirka ta Kudu.

Yanzu haka dai Holland za ta kara ne da kasar Australia a wasanta na gaba a ranar Laraba, yayin da kuma Sifaniya za ta kara Chile a dai ranar ta Laraba. (Saminu)