Yau Litinin 9 ga wata a nan birnin Beijing ne, aka bude taro na 17 na masu zurfin ilimi na kwalejin kimiyya na kasar Sin da taro na 12 na kwalejin injiniyoyi na kasar, inda shugaban kasar Sin Xi Jinping, firaministan kasar Li Keqiang da sauran shugabannin kasar suka halarci taron.

Game da batun zaben masu zurfin ilimi da batun yin ritaya da ake sa lura sosai a fadin kasar Sin a halin yanzu, shugaba Xi Jinping ya jaddada cewa, akwai bukatar a warware wadannan matsaloli ta hanyar yin kwaskwarima, da kyautata tsarin masu zurfin ilimi, don tabbatar da ingancin tsarin ta yadda za a tabbatar matsayinsu a fagen ilimi.

Kwalejin kimiyya da na injiniyoyi na kasar Sin su ne hukumomin ilmi na koli a fannonin kimiyya, fasaha da kuma fasahohin injiniya. Masu zurfin ilimi na kwalejojin biyu sun kware a wadannan fannoni. An zabe su daga cikin masu binciken kimiyya mafi kwarewa a cikin gida da waje, kuma ana kara zaben sabbin kwararru ne a bayan shekaru biyu biyu. (Zainab)