Kamfanin dillancin labarun kasar ta Siriya ya rawaito shugaban hukumar zaben kasar yana cewa, an kawo karshen jefa kuri'un zaben a dukkan tashoshin kada kuri'u dake kasar, an kuma fara kidayar su nan take.
Ya zuwa yanzu ba a bayyana sakamakon zaben ba, amma bisa labarin da wani gidan telebijin mai yada shirye-shirye daga kasar Lebanon ya fitar, an ce yawan mutane da suka jefa kuri'u a zaben na wannan karo ya kai kimanin miliyan 10, adadin da ya kai kashi 63 cikin dari na daukacin mutanen da suka isa jefa kuri'u a kasar, wato miliyan 15.84 wanda gwamnatin kasar ta gabatar kafin zaben.
Kawo yanzu kuma dai ba a bayyana yaushe ne za a bayyana sakamakon zaben ba.
Wannan ne dai karon farko da 'yan takara uku suka shiga zaben shugaban kasar ta Siriya, 'yan takarar da su ka kunshi shugaban kasar na yanzu Bashar al-Assad, da mamba a majalisar dokokin kasar Maher Abdul-Hafiz Hajjar, da kuma wani minista a tsohuwar gwamnatin kasar Hassan al-Nuri. (Zainab)
