Kulaf din kasar Ghana na 'yan wasan kwallon kafa nakasassu mai suna "Black Challenge", zai kara da takwaransa na special Eagles, a wasan sada zumunci da ake fatan bugawa ran 10 ga watan nan na Mayu a birnin Accra na kasar ta Ghana.

Kamar dai yadda hukumar shirya wasannin nakasassun kasar ta Ghana ta sanar, za a yi wasan ne a filin wasa na Lizzy, wasan da kuma zai zamo daya daga wasanni da kulaflikan biyu za su yi, gabanin fara gasar kwallon kafar nakasassu ta duniya dake tafe a kasar Mexico nan gaba cikin wannan shekara.

Kaza lika ana fatan kungiyar "special Eagles" ta Najeriya, za ta karbi bakuncin kulaf din kasar ta Ghana nan da 'yan watanni masu zuwa, a wasan da za su buga a birnin Ikkon jihar Legas.