Rahotannin baya bayan nan na cewa dan wasan tsakiyar nan mai bugawa Chelsea wasa John Obi Mikel, na shirin komawa kulaf din Inter Milan na kasar Italiya. Tuni dai manajan sa ya tabbatar da hakan ga manema labaru.

Mikel Obi wanda dan asalin Najeriya ne ya halarci wasanni 23 da Chelsea ta buga a kakar wasanni ta bana, 13 daga cikin su ya na benci, lamarin da ya sanya aka fara rade-radin akwai yiwuwar ya tsallaka zuwa San Siro.

Tuni dai aka bayyana shirin kulaf din na Inter Milan na karfafa kwarewarsa, da karin shahararrun 'yan wasa, ciki hadda kwaftin din Manchester Nemanja Vidic. Baya ga shi Mikel Obin da za su sayo daga Chelsea.

Kamar dai yadda manajan Obi ya bayyanawa manema labaru, Makel Obi dan wasa ne da ya taba lashe gasar zakarun turai, da gasar cin kofin nahiyar Afirka, don haka ya cancanci babban kulaf irin Inter Milan, ko da yake ya zuwa yanzu dai dan wasa ne na Chelsea.