Ranar 24 ga wata, a birnin Tokyo, hedkwatar kasar Japan, firaministan kasar Abe Shinzo da shugaban kasar Amurka Barack Obama sun yi shawarwari a tsakaninsu dangane da karfafa kawance a tsakanin kasashen 2 da dai sauransu. Amma ba su ba da sanarwar hadin gwiwa bayan shawarwarin ba, saboda ba su cimma daidaito kan daddale yarjejeniyar abokantaka a yankin tekun Pacific ta fuskar tattalin arziki wato TPP ba.

A yayin taron manema labaru da suka shirya tare bayan shawarwarin, shugaba Obama ya ce, har kullum gwamnatin Amurka na ganin, tsibirin Diaoyu na hannun gwamnatin Japan a halin yanzu, wanda Amurka za ta tabbatar da tsaronsa. Amma Obama ya jaddada cewa, gwamnatin Amurka ba ta da wani matsayi kan mulkin kan tsibirin na Diaoyu.

Har wa yau, shugaba Obama ya ce, kasashen Amurka da Sin sun kulla dankon dangantaka a tsakaninsu, kana sun samu moriyar bai daya a fannoni daban daban. Amurka za ta ci gaba da mara wa Sin baya wajen samun ci gaba cikin lumana. Ya kuma gaya wa firaministan na Japan fatansa cewa, kada a rura wuta a batutuwa masu ruwa da tsaki, kuma ya goyi bayan kulla aminci a tsakanin Sin da Japan, a kokarin warware batutuwan ta hanyar tattaunawa.(Tasallah)