Gwamnatin jihar Borno, dake Arewa maso Gabashin tarayyar Najeriya, ta dauki nauyin tura matan jihar su 30 zuwa kasar Sudan, domin karatun ilimin aikin likita.

A kwanan baya ne dai gwamna jihar Kashim Shettima, ya jagoranci wani bikin ban kwana da daliban a gidan gwamnatin jihar dake Maiduguri, kafin daga bisani su tashi zuwa kasar ta Sudan.

Gwamnatin jihar dai za ta biyawa kowace daliba dalar Amurka 9,500, kwatankwacin naira miliyan daya, da dubu dari biyar, a kowane zangon karatu.

Haka kuma gwamnatin ta baiwa dukkanin daliban dala 1000, a matsayin kudin kashewa, sai kuma dala 200, da zata rika aika musu a kowane wata. Kafin tashin daliban, gwamnatin ta kuma rabawa kowaccen su na'ura mai kwakwalwa domin taimaka musu wajen karatun su.

Har wa yau gwamnan jihar ya yi alkawarin ziyartar su, yayin da suke ci gaba da karatu a kasar ta Sudan.(Murtala)