Bugu da kari, shugaba Xi ya ce bisa burin ciyar da dangantakar Sin da Turai gaba, kamata ya yi bangarorin biyu su zurfafa fahimtar juna, da kokari tare, wajen kafa ginshikan wanzar da zaman lafiya, da bunkasuwa, da yin gyare-gyare, da raya al'adu a tsakaninsu.
Shugaba Xi ya kara da cewa, yana gudanar da wannan ziyara ne, da fatan kafa wata gadar aminci da hadin kai, a tsakanin nahiyoyin Asiya da Turai, bisa kokari tare da kawayen nahiyar na Turai, domin ciyar da dangantakar dake tsakani gaba. Ya ce Sin na fatan kara fahimtar Turai, a yayin da nahiyar Turai ke bukatar kara fahimtar kasar Sin.
Xi ya karfafa cewa, muddin aka jingine tarihin kasar Sin, da al'adun ta, da tunanin Sinawa, da sauyin zamanin da kasar ke fuskanta, ba za a iya fahimci hakikanin kasar Sin ba.
Bugu da kari, kasar Sin ba za ta iya kwaikwayon dukkan tsarin siyasa, da hanyoyin bunkasuwa, ba tare da yin gyare-gyare ba, muddin dai tana fatan amfana daga hanyoyin yadda ya kamata, tare da kokarin kaucewa kalubale dake tattare da hakan.
Shugaba Xi ya yi nuni da cewa, a halin yanzu, Sin da Turai suna cikin wani muhimmin lokaci na samun bunkasuwa, suna kuma fuskantar dama da kalubale da ba a taba ganin irinsu a baya ba. Ya ce ya dace sassan biyu su yi kokari tare, wajen kafa gadojin nan Hudu, na bunkasa zaman lafiya, da aiwatar da gyare-gyare, da inganta al'adu a tsakaninsu, ta yadda za su iya raya dangantakar abokantaka a tsakaninsu bisa manyan tsare-tsare, irin dangantakar dake da tasiri babba ga duniya baki daya. (Danladi)
