Babbar wakiliyar kungiyar EU mai kula da harkokin diflomasiyya da tsaro da ke ziyara a kasar Iran Catherine Ashton ta bayyana cewa, babu tabbas game da wata cikakkiyar yarjejeniya da Iran za ta cimma da manyan kasashen duniya game da shirinta na nukiliya.

Ashton ta bayyana hakan ne yayin taron manema labarai na hadin gwiwa da ministan harkokin wajen kasar Mohammad Javad Zarif a birnin Tehran. Ta ce kwarya-kwaryar yarjejeniyar da aka cimma da kasar tana da muhimmanci.

Ta ce ko da yake, akwai matukar wahala kafin a cimma yarjejeniya ta karshe da kasar ta Iran, kuma babu tabbas cewa za a kai ga cimma hakan. Amma tana fatan hakan za a samu tare da goyon bayan 'yan kasar ta Iran da kuma al'ummomin kasa da kasa.

A nasa bangaren, Zarif ya bayyana kudurin kasarsa na warware batun nukuliyar kasar, yana mai cewa, hakan ya dogara ga yunkurin sauran bangarorin da abin ya shafa na warware wannan matsalar a kan teburin sassantawa. (Ibrahim)