Kulaf din Malaga dake matsayi na Hudu daga kasa, ya gaza tsallake tarkon dake kafar sa na faduwa kasa warwas, bayan da ya tashi 1-1 da Villadolid wanda ke matsayi na Uku daga kasa.
Shi kuwa kulaf din Getafe tarihin sa na rashin nasara ne ya karu, bayan da ya tashi wasan sa da Espanyol canjaras ba ci. Wannan dai sakamako ya sanya Getafe shafe wasanni 11 ba nasara, lamarin da ke barazana ga nasarar kulaf din baki daya, baya ga kocin sa Luis Garcia daka iya fuskantar kora.
A bangaren kulaflikan da suka tserewa fadowa daga teburin gasar akwai Elche, wanda ya samu maki 3, bayan ya ci Celta Vigo kwallo daya mai ban haushi. Sai kuma Athletic Bilbao wanda ya lallasa Granada da ci 4 da nema.
A can saman tebur kuwa, Real Madrid zata kara da Atletico Madrid, yayin da Bercelona zasu raba raini da Almeria a ranar Lahadi. (Saminu Alhassan)
