A yau Litinin ne shugaban rikon kwarya na kasar Ukraine, ya bayar da sammacin kama shugaba Viktor Yanukovych, bisa zargin aikata manyan laifuffuka kan masu bore a makon da aka kwashe ana zubar da jini a Kiev, babban birnin kasar.

Mai rikon mukamin ministan cikin gida na kasar Arsen Avakhov ya rubuta a shafinsa na Facebook cewa, an sanya sunan hambararren shugaban kasar da sauran jami'an kasar da dama cikin jerin mutanen da ake nema ruwa a jallo a Ukraine, saboda laifin kashe jama'a, inda ya ce shugaba Yanukovich ya isa yankin Crimea ne a daren ranar Lahadi.

Rahotanni na cewa, Yanukovich ya bar kasar ce ranar Jumma'a ta wani jirgi mai saukar ungulu, bayan sanya hannu kan wata yarjejeniya da 'yan adawa da nufin kawo karshen tashin hankalin kasar. (Ibrahim)