Dan wasan tsakiyar kulob din Manchester City Yaya Toure, ya bayyana yanayin da yake ciki gabanin karawar da kulaf din sa na Manchester City ya yi da tsohon kulof dinsa na Barcelona. Wasan da aka tashi Barcelona na da ci 2, Manchester City kuma na nema. Rahotanni sun bayyana cewa dan wasan gaban Barcelona Lionel Messi ne ya fara jefa kwallo a zaren Manchester City ta bugun daga kai sai mai tsaron gida a minti na 54 da fara wasan, sai kuma kwallon da Dani Alves ya ciwa Barca daf da tashi daga wasan.

Kafin take wannan wasa dai sai da Yaya Toure dan asalin kasar kwadibua, ya bayyana cewa shafe shekaru 3 yana takawa kulaf din Barca kwallo da yayi a baya, ya bashi damar samun fasahohi masu inganci, ya kuma yi abokai da dama kafin komawarsa Manchester City. Yace fuskantar wadannan abokan wasansa a matsayin abokin hamayya ba abu ne mai sauki ba.

Toure ya bayyanawa wakilin shafin yanar gizo na UEFA.com cewa, ba ya so ya kara da Barca a gaban jama'ar da a baya, suka rika nuna masa goyon baya da kauna, sai dai a cewarsa hakan ya zama dole tunda haka kwallo ta gada.

Don gane da banbancin rawar da yake takawa a kulaflikan Biyu, Toure ya ce komawar sa Man City ya bashi damar sauya wuraren taka leda tun daga tsakiya, gefe da kuma bayan kungiyar, sabanin zaman sa a Barca, inda ya ke buga tsakiya kadai. Bugu da kari Toure ya ce ya fi son salon kwallon kulaflikan kasar Ingila, wanda ke tattare da kai hare-hare cikin saurin gaske.(Bello Wang)