Manzon musamman na MDD da kungiyar kawancen kasashen Larabawa game da batun Syria, Lakhdar Brahimi, ya shaidawa manema labarai cewa, wakilan gwamnatin Syira da na 'yan adawar kasar, sun fara tattaunawa kan yanayin tsaron da ake ciki a halin yanzu a kasar Syria, yayin da aka shiga rana ta shida ta tattaunawar da bangarorin biyu ke yi a Geneva.

Brahimi ya bayyana cewa, sassan biyu sun dauki lokaci mai tsawo suna tattaunawa, inda aka tabo muhimmin batu, wato yanayin tsaro a Syria da kuma batun ayyukan ta'addanci wanda aka amince cewa, akwai shi kuma wata babbar matsala ce da ake fuskanta a cikin kasar ta Syria, amma ba a cimma wata matsaya ba game da yadda za a magance wannan matsala.

Brahimi ya ce, sanin kowa ne cewa, muddin ana bukatar warware matsala tare da samun zaman lafiya da tsaro a Syria, tilas sai an magance matsalar tsaro da farko.(Ibrahim)