Gidan rediyon kasar Sin CRI ta kafa sashen fassara fina-finan Sinanci zuwa harsuna daban-daban a ranar Alhamis din nan 23 ga wata. Mataimakin hukumar rediyo, fina-finai, telibijin na kasar Sin Nie Chenxi, shugaban gidan rediyon kasar Sin Wang Gengnian, mukadashin jakadan kasar Nijeriya mai kula da harkokin ciniki Mr Nicholas Ella da dai sauransu sun halarci biki.

Mr Ella ya bayyana kyakkyawar fata ga kafuwar wannan sashin,yana mai cewa, a watan Satumba na shekarar bara, an gabatar da shirye-shiryen telabiji na harshen Hausa na farko mai suna "Soyayyar matasan Beijing" a Nijeriya, matakin da ya bayyana cewa, Sinawa na mutunta jama'ar kasar da al'adunta.

Mr Ella wanda ya wakilci jakadan kasar Nijeriya a kasar Sin Malam Aminu Wali,yayi fatan kasashen biyu zasu kara mu'ammala a wannan fanni ta yin amfani da sashin yadda ya kamata. (Amina)