A ranar 20 ga wata, a nan birnin Beijing, an kaddamar da bikin bude taron koli na biranen da suka fi kirkiro da sabbin tunani na hukumar kula da ilmi, da kimiyya, da al'adu na MDD wato UNESCO a babban dakin adana kayayyakin tarihi na kasar Sin, mataimakiyar firaministan kasar Liu Yandong ta halarci bikin, kuma ta gana da babbar direktar hukumar UNESCO Irina Georgieva Bokova.

Liu Yandong ta ce, gwamnatin Sin ta dora muhimmanci sosai game da hadin gwiwa dake tsakanin kasar Sin da hukumar UNESCO, kuma tana fatan ci gaba da fadada hadin gwiwa a tsakaninsu, da kara cusa abubuwa cikin hadin gwiwa a tsakaninsu ta hanyoyi da dama, don kara inganta mu'amalar al'adu a tsakanin kasashe da dama, don ba da gudummawa wajen samun dauwamammen ci gaba na dan Adam.

A nata bangare kuma, Bokova ta jinjina dangantakar hadin gwiwa a tsakanin bangarori biyu, kuma tana fatan inganta hadin gwiwa a fannin ilmi da kimiyya da al'adu a tsakaninsu.(Bako)