Yanzu haka, 'yan kasuwar kasar Sudan ta Kudu fiye da 100 suna birnin Guangzhou dake kudancin kasar Sin, don halartar gagarumin bikin baje-kolin kayayyaki kirar kasar Sin.

Wannan tawaga, wadda ta kunshi kwararru a fannonin aikin banki, da gine-gine, da na'urorin aikin jinya, da na sashen mai da iskar gas, da na aikin tsabtace ruwa, da wutar lantarki, da dai sauransu, za kuma ta tattauna da wakilan kamfanonin kasar Sin daban daban.

Makasudin ziyarar 'yan kasuwar a wannan lokaci dai shi ne, karfafa hadin gwiwa tsakanin bangarorin 2, musamman ma a bangarorin tattalin arziki, da kasuwanci, da harkokin zuba jari, da musayar fasahohi tsakanin al'ummun kasashen Biyu. (Bello Wang)