Kasar Sin na fatan za a maido da kwanciyar hankali da bunkasuwa a kasar Masar cikin hanzari
Hong Lei, kakakin ma'aikatar harkokin wajen kasar Sin ya bayyana a ranar 6 ga wata cewa, kasar Sin ta yi tir da harin da aka yi ta hanyar dasa bom cikin mota a kasar Masar a jiya Alhamis ranar 5 ga wata.
Hong Lei ya fadi haka ne a yayin taron manema labaru da aka saba shiryawa a nan birnin Beijing. Ya kara da cewa, kasar Sin na fatan za a maido da doka da oda a kasar ta Masar cikin hanzari, da kuma aiwatar da shirin shimfida wani tsarin siyasa na wucin gadi yadda ya kamata, a kokarin tabbatar da samun kwanciyar hankali da bunkasuwa a kasar. (Tasallah)
