Wasu kafofi da ma kafofin watsa labarai a kasar Najeriya sun bayyana cewa akalla mutane 18 sun rasa rayukansu a fada da aka yi a makon da ya wuce tsakanin dakarun gwamnati da 'yan kungiyar Boko Haram a yankin arewa maso gabashin kasar.

Cikin matattun, guda 11 na daga cikin wadanda aka kashe ranar alhamis a wani sabon hari da ake kyautata zaton cewa 'yan kungiyar Boko Haram ne suka kai a garin Damboa na jihar Borno dake yankin arewa maso gabashin kasar inji kafofi.

A kuma ranar juma'a, an kashe 'ya'yan kungiyar Boko Haram guda 7 yayin musayar wuta da 'yan sanda a jihar Gombe dake makwabtaka da ita inji kafofin watsa labaran kasar.

A Damboa, mazauna garin na zargin cewa wasu 'yan kasar waje masu magana da Larabci kuma masu farar fata suna daga cikin maharan.

Ayamu Lawal Gwasha, dan majalisa dake wakiltar Damboa a majalisar dokokin jihar Borno ya gayawa kamfanin dillancin labaran kasar Sin Xinhua cewa har yanzu jama'arsa na zaman dar dar. (Lami Ali Mohammed)