Kamfanin dillancin labarai na kasar Sin Xinhua ya ba mu labarin cewa, firaministan Tunisiya Ali Larayedh a ranar Litinin din nan ya yi kira da a yi babban zabe a ranar 17 ga watan December mai zuwa duk da korafe korafe da ake yi na son a soke gwamnatin rikon kwarya da jam'iyyar masu kishin Islama suka kafa.

Kamar yadda gidan talabijin din kasar ta sanar, firaministan ya jaddada cewa gwamnatin sa ba za ta cigaba da makalewa a karagar mulki ba, amma dai za ta sauke nauyin dake kan wuyan ta.

Wannan sanarwar ta Ali Larayedh ta zo kwanaki 4 bayan kissan gillar da aka yi ma Mohammed Brahmi, babban mai hamayya da gwamnatin Ennahdha a majalissar mulkin kasar.

Tun bayan wannan kissan gillar, daruruwan mutane suka bazama a kan tituna suna kiran da gwamnati ta sauka daga mulki. (Fatimah)