Rahotannin baya bayan nan daga Mali sun bayyana cewa dubun-dubatar al'ummar kasar sun fara kada kuri'u a zaben shugaban kasar da aka tsara gudanarwa yau Lahadi.
Rahotannin da kamfanin dillancin labarun kasar Sin Xinhua ya fitar na nuna cewa, an bude runfunan zaben ne tun daga misalin karfe 8 na safe. Ana dai sa ran zaben kasar ta Mali zai kawo karshen rikicin siyasar da ya kici-yaki-cinyewa tun cikin watan Maris na shekarar bara, yayin da soji suka hambarar da zababbiyar gwamnatin kasar, yayin da kuma Arewacin kasar ya fada hannun 'yan tawayen kasar. (Saminu Alhassan)
