Kwamitin ya ba da labarin cewa, a cikin wannan tawagar 'yan sa ido, akwai masu sa ido 3830 na kasar ta Mali da kuma wasu 1281 daga kasashen waje. Yawancin masu sa ido na kasar sun fito ne daga wasu kungiyoyi da hukumomi na kasar masu zaman kansu, yayin da na kasashen waje suke daga kungiyar tarayyar Afirka da ta Turai, kungiyar kasashe masu amfani da harshen Faransanci, kungiyar bunkasa tattalin arzikin kasashen yammacin Afrika ta ECOWAS da dai sauransu.
Ban da haka kuma, kasashen Afirka ta Kudu, Nijeriya, Amurka su ma sun aika da nasu masu sa ido zuwa kasar ta Mali. An labarta cewa, za a aika da wadannan masu sa ido zuwa manyan yankuna guda 8 na kasar, inda za su sa ido kan yadda za a gudanar da babban zaben daga farko zuwa karshe.
Bisa shirin da aka tsara a baya, an ce, za a jefa kuri'ar zaben shugaban kasar ta Mali a zagaye na farko ranar Lahadin nan. Idan babu wanda ya sami rabin kuri'u ko fiye da haka, za a gudanar da zagaye na biyu na zaben a ran 11 ga wata mai zuwa. 'Yan takara 27 ne dai suka shiga zaben zama shugaban kasar a wannan karo, ciki had da tsoffin firaministocin kasar 4 da wasu 'yan siyasa masu fada-a-ji.(Tasallah)
