Kamfanin dillancin labaru na kasar Koriya ta Kudu ya ambato kamfanin dillancin labaru na Koriya ta Arewa a ranar 16 ga wata yana cewa, kakakin kwamitin tsaron kasar Koriya ta Arewa ya yi wani jawabi a wannan rana, inda ya bada shawarar yin shawarwari a tsakanin manyan jami'an kasarsa da na kasar Amurka don tattauna batutuwa da dama ciki har da batun hana yin amfani da makaman nukiliya.

Kakakin ya bayyana cewa, manyan jami'an kasar Koriya ta Arewa da na Amurka za su tattauna batutuwan sassauta matsanancin halin aikin soja, canja tsarin dakatar da yin yaki a zirin Koriya zuwa tsarin samun zaman lafiya a zirin, da kafa yanayin duniyar maras makaman nukiliya da kasar Amurka ta gabatar da dai sauransu. Ana sa ran kasar Amurka za ta tsara lokaci da wurin da za a gudanar da shawarwarin.

Ban da wannan kuma, kakakin ya ce, idan kasar Amurka tana son kafa duniyar maras makaman nukiliya, kuma sassauta matsanancin halin soja a yanzu, kamata ya yi Amurkan ta yi amfani da wannan dama, ta kuma amsa kiran kasar Koriya ta Arewan. (Zainab)