'Yan sama jannati na Shenzhoun mai lamba na 10 su shiga cikin Tiangong-1 a yammacin ranar Alhamis din nan 13 ga wata, kamar yadda cibiyar kula da kunbuna na kasar Sin ta sanar a nan birnin Beijing.

'Yan sama jannatin su uku, Nie Haisheng, Zhang Xiaoguang da kuma Wang Yaping sun bude mabudin Tiangong-1 da misalin karfe 4 da minti 17 na la'asariyar yau din nan bayan da kunbon ya kamala ayyukan hadewa da Tiangong-1 din da karfe 1 da minti 18 a yammacin yau.

Za su gudanar da binciken kimiyya da na fasaha a lokacin wannan zama da za su yi a cikin kunbon domin samar da wassu karin ilimi a kan ayyukan tashoshin samaniya a nan gaba.

Shi dai kunbon Shenzhou-10 wanda aka kaddamar da shi a ranar Talatan nan da ta gabata da la'asar a hamadan Gobi dake arewa maso yammacin kasar Sin, ya fara tunkarar Tiangong-1 ne kai tsaye da misalin karfe 10 da minti 48 na safiyar yau Alhamis 13 ga wata kuma ya samu nasarar haduwa da kunbon dake sama da misalin karfe 1 da minti 11 na rana.(Fatimah)