A yammacin jiya Talata 11 ga wata, shugaban kasar Sin Xi Jinping ya gana da wakilai daga kungiyoyin da suka shafi ayyukan harba kumbon shenzhou mai lamba 10, a tashar harba kumbo na garin Jiuquan.

A lokacin ganawar, Shugaba Xi ya isar da fatan shi na alheri da matukar godiya a madadin kwamitin tsakiya na jam'iyyar kwaminis, majalissar gudanarwa ta kasa, da kuma kwamitin tsakiya na soja ga daukacin wadanda suka halarci bukin harba kumbon na baya bayan nan da aka yi a yammacin jiyan,wanda ya kunshi 'yan sama jannati uku, maza biyu mace daya.

Shugaban ya ce, an harba kumbon Shenzhou mai lamba 10 cikin nasara, kuma yanzu haka yana shawagi a sararin samaniya, abin da ke nuna cewa, wannan shi ne karo na biyar da kasar Sin ta samu nasarar harba kumbo a sama.

A cikin jawabinsa Mr. Xi ya lissafa burin ganin an samu nasara zuwa sararin samaniya da kasar Sin ta yi ta yi tun ba yau ba, wanda ya sa ta yi ta inganta shirye-shiryenta na ayyukan kumbuna tare da maida kasar a kan tafarkin ikon na ayyukan kumbuna, inda ya yaba kwarai bisa ga kokarin ma'aikatan wannan fannin. Yana mai nuna cewa, sun nuna hazaka da himma suna ganin kasar ta cigaba a bangaren hidimomin sararin samaniya.

Ma'anar ayyukan Shenzhou mai lamba 10, in ji Shugaba Xi, yana da muhimmanci kwarai da gaske ga ci gaban kasar a ayyukan da suka shafi sararin samaniya, sannan kuma zai inganta gwaje-gwajen da ake yi a dakunan gwajin da suka shafi sararin samaniya da tashoshinsa.(Fatimah Jibril)