Shugaban kasar Sin Xi Jinping a yau Litinin 27 ga wata ya gana da Thomas Donilon, mai ba da shawara ga shugaban kasar Amurka ta fuskar harkokin tsaro a nan birnin Beijing, inda ya bayyana cewa, ya kamata Sin da Amurka su nuna azama wajen raya dangantakar abuta ta hadin gwiwa a tsakanin kasashen biyu bisa babbar moriyar jama'arsu da kuma ta duniya baki daya, wadda ba a taba ganin irinta ba.

Shugaba Xi ya bayyana cewa, yana sa ran ganin ganawar da zai yi da takwaransa na Amurka Barack Obama a farkon wata mai zuwa, zai bada damar da zasu yi musayar ra'ayi kan muhimman batutuwan da ke jawo hankalinsu, a kokarin kara fahimtar juna, da amincewar juna, da kuma inganta hadin kansu.

A nasa jawabin, Mr. Donilon ya tabbatar da cewa, akwai muradu bai daya a tsakanin Amurka da Sin. Kuma raya dangantakar kud-da-kud a tsakanin kasashen biyu cikin yakini zai ba da taimako gare su, da yankin Asiya da tekun Pacific, har ma da duniya baki daya. Don haka kasar Amurka na son yin kokari tare da kasar Sin don tabbatar da samun nasarar ganawar da shugabannin kasashen biyu za suyi,(Kande Gao)