A kokarin kyautata batun ba da kudin agaji da kasashen duniya suka yi ga kasar Mali, a ranar Laraba 15 ga wata, kungiyar tarayyar kasashen Turai (EU), kasar Faransa, da kuma Mali sun shirya wani taron bangaren masu ba da kudin agaji ga kasar Mali a matsayin koli na duniya a birnin Brussels. Dangane da hakan ne, a ranar Alhamis 16 ga wata, kakakin ma'aikatar harkokin waje ta Sin, Hong Lei ya bayyana a nan birnin Beijing cewa, Sin tayi maraba da wannan batu, tare da tura wani babban jami'in kasar dake tawagar kungiyar EU domin halartar taron da yin jawabinsa.

A game da hanyar da Sin take bi wajen nuna goyon baya ga kasar Mali wajen samun bunkasuwa cikin lumana, Hong ya yi bayanin cewa ya zuwa yanzu, an samu kyautatuwa a fannin siyasa da tsaro a kasar Mali, sai dai ana ci gaba da fuskantar manyan kalubaloli wajen daidaita matsalolin baki daya. A matsayin aminiyar Mali, Sin na mai da hankali sosai kan yanayin da ake ciki a kasar, tare da kokarin ba da taimako ta hanyoyi daban daban, da zummar cimma burin samun bunkasuwa cikin lumana.

A kwanan baya ne dai, gwamnatin rikon kwarya ta kasar Mali ta fitar da wani shirin samun dauwamammiyar farfadowa kuma kasar Sin ta riga ta ba da agaji kan wannan shiri.Don haka take kira ga kasa da kasa da su cika alkawarinsu cikin lokaci, a kokarin kara taka rawar a zo a gani wajen sa kaimi ga sha'anin na Mali.(Fatima)