Wani dan sanda da ba ya son fayyace sunansa ba ya bayyana cewa, 'yan sanda sun gano gawawwaki 5 a Hamam al-Alil dake kudu da birnin Mosul hedkwatar lardin liwa-al-neineva a yankin arewacin kasar, kuma yayin da aka gano gawawwakin, an same su da ankwa da marufin idanu, tare da harbin bindiga da dama a jikinsu.
Bisa labarin da wani jami'in ma'aikatar kula da harkokin cikin gida na Iraqi ya bayar, an ce, wani mutum mai dauke da bindiga ya bude wuta kan wasu gungun mutane a garin Mashahda, da ke da nisan kilimita 40 a arewa da birnin Bagadaza, hedkwatar kasar, wanda hakan ya yi sanadiyyar mutuwar mutane a kalla 3. Ban da wannan kuma, wasu masu dauke da bindiga 2 sun kutsa kai cikin wani gida da ke unguwar Karrada dake cibiyar birnin Bagadaza, inda suka kashe mata guda 4 a wurin.(Bako)
