Bangaren 'yan sandan birnin Boston na kasar Amurka ya tabbatar a ranar 15 ga wata cewa, an fuskanci fashewar boma-bomai sau uku yayin da ake gudanar da gasar gudun yada-kanin-wani a wannan rana da yamma, wadanda suka haddasa mutuwar mutane 3, kana mutane fiye da dari daya sun ji rauni. A halin yanzu, ba a gano dalilin da ya sa abkuwar lamarin ba, kana babu wata kungiya da ta sanar da daukar alhakin lamarin.

'Yan sandan birnin Boston da masu shirya gasar sun tabbatar da cewa, an yi fashewar boma-bomai sau biyu a wurin dake dab da karshen layin gasar. Shugaban 'yan sandan birnin Ed Davis ya bayyana a gun taron manema labaru da aka gudanar cikin gaggawa a wannan rana da yamma cewa, bom na uku ya fashe ne a dab da dakin karatu na JFK na Boston, amma 'yan sandan ba su tabbatar da cewa, ko fashewar bom din na uku na da nasaba da fashewar boma-bomai biyu da aka samu kafin shi ba.

Bisa labarin da kafofin watsa labaru na kasar Amurka suka bayar, an ce, 'yan sandan sun gano boma-bomai biyu na daban a dab da wurin abkuwar lamarin, kuma ana kokarin kawar da su.

Don tinkarar lamarin, 'yan sandan birnin na Boston sun sanar da hana zirga-zirgar jiragen sama a yankin da lamarin ya faru. Kana wasu manyan biranen kasar kamar New York da Washington D.C sun dau matakan musamman a wuraren da aka fi samun yawan mutane don magance abkuwar lamarin kamar hakan.

A wannan rana kuma, shugaban kasar Amurka Barack Obama ya yi wani jawabi a fadar shugaban kasar wato White House, inda ya yi alkawarin bin bahasin wannan lamari tare da kama masu hannu a lamarin. Kana ya ce, za a kara daukar matakan da suka wajaba don tabbatar da zaman lafiya a kasar, da kuma yin bincike kan dalilin abkuwar lamarin. (Zainab)