Mahukunta a kasar Somaliya sun bayyana dage babban zaben kasar da a baya aka shirya gudanarwa a ranar 28 ga watan nan na Disamba, ya zuwa watan Janairun sabuwar shekara dake daf da kamawa. Hakan dai a cewar wata majiya mai kusanci da fadar gwamnatin kasar, ya biyo bayan sabani da aka samu game da lokacin gudanar da zabukan majalisun dokokin kasar biyu.

Kawo yanzu dai ba a ayyana takamaiman lokacin da za a gudanar da zaben cikin watan na Janairu ba. Kaza lika wannan ne karo na hudu ana dage babban zaben kasar, wanda tun da fari aka tsara gudanarwa tun cikin watan Satumbar da ya shude.

Wasu al'ummun kasar dai sun nuna damuwarsu game da yawan dage babban zaben kasar, duk kuwa da kiraye kiraye da kasashen duniya ke yi, na ganin an gudanar da zaben a kan lokacin, kamar kuma yadda kundin mulkin kasar ya tanada. (Saminu Hassan)