Wani Jami'i ya bayyana cewa, akalla, sojoji shida ne suka mutu, yayin da wasu mutane goma sha uku ciki har da mata da kananan yara suka jikkata, a wani harin da mayakan kungiyar Al-shabaab suka kai Mogadishu, babban birnin kasar Somali.

Kakakin gwamnatin Mogadishu, Abdifitah Omar Halane, da ya tabbatar da adadin wadanda suka mutum, ya ce bam da ake tadawa da na'ura da aka binne a karkashin wata bishiya, da nufin kai hari kan sojojin dake hutawa a karkashinta.

Bam din ya tashi ne a wani wuri da ake ganinsa a matsayin mashigar Mogadishu, wanda zai kai ga wasu sassan kudancin kasar.

Wannan harin shi ne na biyu da aka kai a jiya Alhamis, domin sa'o'I kalilan kafin aukuwarsa, wasu mutane uku sun jikkata, sanadiyyar harin kunar bakin wake da wani ya kai a cikin mota, inda ya ajiye motar a wajen wani gidan cin abinci dake kusa da fadar shugaban kasar.

Tuni dai kungiyar Alshabaab ta dauki nauyin kai dukkan hare-haren biyu.

Hare-haren na zuwa ne a lokacin da ake sa ran 'yan majalisar dokokin kasar za su zabi sabon shugaban kasa a ranar 28 ga watan Decemba.

Kungiyar Al-shabaab na ta kaddamar da hare-hare a Somalia ne da nufin hambarar da gwamnatin kasar.

Don ko makonni uku da suka gabata, sai da wani hari da aka kai a gabar teku a birnin Mogadishu ya yi sanadin mutuwar mutane ashirin da tara.(Fa'iza)