2020-08-04 14:54:51        cri

Wakilin dindindin na kasar Indonesia a MDD, kuma jagoran kwamitin tsaron majalissar na watan Agustar nan Mr. Dian Triansyah Djani, ya ce MDD na fatan kara rubanya kokarin ta, game da tattauna batutuwan da suka jibanci yaki da ta'addanci cikin wannan wata.

Mr. Djani, ya bayyana hakan ne yayin taron manema labarai, biyowa bayan gabatar da rahoton aiki da kwamitin tsaron ya fitar a jiya Litinin. Jami'in ya kara da cewa, kwamitin tsaron zai kira taron ministoci a ranar 6 ga watan nan, domin gudanar da muhawara game da alakar dake tsakanin akidun ta'addanci, da kungiyoyin kasa da kasa na masu aikata muggan laifuka.

Ya ce za kuma a yi karin haske game da wannan muhimmin batu, yayin gabatar da rahoton shekaru biyu-biyu na babban sakataren MDD, game da barazanar da kungiyar IS da ISIL ko Da'esh suke haifarwa a Iraqi, a ranar 24 ga watan na Agusta. (Saminu)