A ranar Alhamis majalisar wakilan kasar Amurka ta amince da kudirin doka da nufin takawa shugaban kasar Donald Trump birki na hana shi yin amfani da karfin iko wajen daukar matakin soji kan kasar Iran ba tare da sahhalewar majalisar dokokin Amurka ba.

Kudirin dokar ya samu goyon bayan 'yan majalisar 224 yayin da mambobi 194 suka yi watsi da shi.

Kudirin dokar ya umarci shugaban kasar da ya janye aniyarsa ta yin amfani da jami'an sojojin Amurka wajen yin ramuwar gayya kan kasar Iran, har sai idan shugaban ya samu amincewar majalisar dokokin ko kuma sai idan ya zama babu makawa sai an yi amfani da matakin sojin. (Ahmad)