Jiya Laraba, jaridar Algomhuria da ta kasance daya daga cikin manyan jaridun daily na kasar Masar, ta ware shafin musamman game da cika shekaru 40 da aka soma yin kwaskwarima a cikin gida da bude kofa ga kasashen waje a kasar Sin, inda aka wallafa wani sharhi mai taken "Shugaba Xi Jinping ya jagoranci kasar Sin shiga sabon zamani na yin kwaskwarima", a cikin sharhin, an ce manufar kafa "al'umma mai kyau ga duk bil Adama" da shugaba Xi Jinping ya gabatar ta nuna kokarin da kasar Sin ke yi na neman ra'ayin darajar bai daya ta bil Adama.

Sharhin ya yi bayani kan aniyar shugaba Xi Jinping ta inganta yunkurin yin kwaskwarima a cikin gida. Ya kuma ruwaito bayanan wasu jami'an sa ido a fannin kudi da jami'ai na kasashen ketare, don nuna yabo ga ma'anar manufar yin kwaskwarima a cikin gida da bude kofa ga kasashen ketare da Sin ta gudanar a cikin shekaru 40 da suka gabata, da kuma mihimmiyar rawar da Sin ke takawa wajen ciyar da tattalin arzikin duniya gaba yadda ya kamata, da kiyaye zaman karko na tsarin harkokin duniya da dai sauransu. A sa'i guda kuma, sharhin na cike da fatan alheri na ganin nasarorin da kasar Sin ta samu wajen gudanar da manufar za su amfanawa duk duniya, tare kuma da kafa makoma mai kyau ta hadin kai a tsakanin kasashe masu tasowa wajen neman ci gaban tattalin arziki a nan gaba. (Bilkisu)