Gwmnatin kasar Morocco ta fara aiwatar da wata sabuwar doka a jiya Laraba, wadda za ta taimaka wajen kare mata daga cin zarafi. Tun a ranar 14 ga watan Fabarairun wannan shekara ne dai majalissar dokokin kasar ta amince da dokar mai tsauri, wadda karkashinta, za a rika hukunta masu cin zarafin mata, musamman makusantan su, da masu iko da su, da wadanda alhakin kare su ke wuyan su.

A karon farko dokar ta tanaji haramci ga yiwa mata auren dole, da kuma cin zarafin mata ta hanyar talala da su.

Cikin watannin baya bayan nan dai, laifuka masu nasaba da cin zarafin mata a kasar na kara yawaita, matakin da ya sanya matan kasar gudanar da zanga zanga, domin matsawa gwamnati lambar samar da tsauraran dokoki, na hukunta masu aikata wannan ta'asa, ta kuma baiwa matan Morocco damar samun walwala a tsakanin al'umma. (Fa'iza Mustapha）