Kakakin babban bankin Najeriya CBN Isaac Okorafor, ya ja hankalin 'yan kasar da su kauracewa yin duk wani abu da zai lalata takardun kudin kasar yayin da suke ta'ammali da su.

Okorafor ya ce lalata talardun Naira tamkar wulakanta kimar kasar ne. Kana ya bayyana damuwar sa game da yadda wasu 'yan kasar ke watsi, tare da tattaka takardun kudin kasar a wuraren bukukuwa wanda hakan ke sanyawa su lalace.

Jami'in na babban bankin Najeriya ya kara da cewa, a halin da ake ciki sun dukufa wajen wayar da kan al'umma a sassan kasar daban daban, hanyoyin da za su gane takardun Naira na jabu, da yadda za su rike kudi ba tare da sun lalata su ba.

Ya ce bai dace a rika rubutu kan takardun na Naira ba, haka kuma ya zama wajibi a kaucewa sanya masu datti ko yamutse su.(Saminu Alhassan)