An yi bikin murnar cika kwanaki 1000 na buga wani littafin da shugaban kasar Sin Xi Jinping ya rubuta mai alaka da dabarunsa a fannin kula da wata kasa a karshen makon da ya gabata. Littafin da ya kafa tarihi a harkar buga littattafai ta kasa, ganin yadda aka buga kofi na littafin har wasu miliyan 6 da dubu 250 a kasashe daban daban, wadanda aka fassara su zuwa harsuna 22.

Littafin mai taken "Xi Jinping: dabarun kula da kasar Sin", ya kushi babi 79 na wasu jawabai da bayanan da shugaba Xi Jinping ya gabatar, tsakanin shekarar 2012 da ta 2014. Ana ganin wannan littafi a matsayin hanyar fahimtar dabarun shugabanci na kasar Sin, da kuma fasahohin kasar a fannin neman ci gaban kasa.

Bayanai masu muhimmanci da littafin ya kunsa sun janyo hankulan manyan kusoshin kasashe daban daban. Cikinsu firaministan kasar Cambodia Hun Sen ya nemi samun wani kofin littafi na musamman wanda zai iya karanta shi kan wayar salularsa, yayin da firaministan kasar Thailand, Prayut Chan-o-cha, ya gabatar da littafin ga ministocin kasarsa. A nashi bangaren, shugaban kamfanin Facebook Mark Zuckerberg ya sayi littafin domin abokan aikinsa da shi kansa. A cewarsa, ta hanyar karanta littafin, zai sa a samu damar fahimtar mene ne ' tsarin gurguzu na musamman na kasar Sin'.(Bello Wang)