Bangaren sojojin kasar Isra'ila ya sanar a Lahadi 27 ga wata da cewa, wasu sojojinsa sun yi musayar wuta da wasu mutanen dake dauke da makamai a kan iyakar Isra'ila da Sham, inda aka kashe masu dauke da makamai 4. A cewar sojojin Isra'ila, mutanen da suka mutu suna da alaka da kungiyar masu tsattsauran ra'ayi ta IS.

A safiyar Lahadi bisa agogon wurin, daga cikin yankin da kasar Sham ta mallaka kan tudun Golan, wasu dakaru sun kai hari ga yankin da sojojin Isra'ila suka mallaka, inda daga cikin makaman da suka yi amfani da su har da karamar igwa. Nan take sojojin Isra'ila sun mayar da martani, kuma sun tura jiragen saman yaki domin yin luguden boma-bomai. Sakamakon dauki-ba-dadi shi ne an lalata motoci da makamai na dakarun, tare da kashe wasu 4 daga cikinsu. Yayin da a bangaren sojojin Isra'ila, babu wanda ya mutu ko kuma ya ji rauni.

A cewar sojojin saman Isra'ila, mutanen 4 mambobi ne na kungiyar Yarmuk Martyrs, wadda ke da alaka da kungiyar IS.(Bello Wang)