in Web hausa.cri.cn
ShigaZaman RayuwaAfirka a YauSin Ciki da WajeAmsoshin TambayoyiWasannin Motsa JikiChina ABC::: TSOHO :::
Saina Nehwal ta zama mambar kwamitin 'yan wasanni na Olymphic
2016-10-26 21:03:51 cri
A kwanakin baya kafofin watsa labaru na kasar Indiya sun bayyana cewa, 'yar wasan kwallon badminton Saina Nehwal, ta zama sabuwar mamba a kwamitin 'yan wasanni na Olymphic ko IOC, bayan zaben membobin kwamitin da aka yi, yayin da ake gudanar da gasar wasanni ta Olympics a birnin Rio, an kuma bayyana cewa shugaban kwamitin na IOC Thomas Bach ya tabbatar da nadin ta.

Saina Nehwal ta samu kuri'u 1233 a zaben, wadda hakan ya sa ta zama a matsayi na shida, a matsayin sabuwar mambar kwamitin 'yan wasan na IOC na wannan karo. Sauran sabbin membobin kwamitin biyar sun hada da dan wasan kwallon tebur na kasar Koriya ta Kudu Ryu Seung-min, da 'yar wasan takobi ta kasar Jamus Britta Heidemann, da dan wasan iyo na kasar Hungary Daniel Gyurta, da 'yar wasan tsalle ta hanyar amfani da sanda ta kasar Rasha Yelena Isinbayeva, da kuma 'yar wasan keke ta kasar New Zealand Sarah Walker.

A watan Afrilun shekarar 2015 ne aka gabatar da sabon jerin sunayen 'yan wasan kwallon badminton mata mafi kwarewa a duniya, inda Nehwal ta maye gurbin 'yar wasan kasar Sin Li Xuerui, a matsayin zakara a jerin sunayen. A kuma wannan karo ne ta fara zama 'yar wasan kwallon badminton daga kasar Indiya ta farko da ta kai matsayin farko a duniya.

A halin yanzu, Nehwal din ce ke matsayi na biyar a duniya, kuma ba ta samu lambar yabo a gasar wasannin Olympics a Rio ba saboda rauni da ta ji.

Kwamitin 'yan wasannin na Olympic, kwamiti ne na musamman dake karkashin jagorancin kwamitin na IOC, yana kuma kunshe da mambobi 'yan wasa 12. A kan zabi mambobin sa a yayin da ake gudanar da gasar wasannin Olympics ta lokacin zafi ko ta sanyi. Kuma a wannan karo, an zabi sabbin membobin kwamitin guda shida. (Zainab)

Labarai masu Nasaba
Ra’ayoyinku
  Webradio
Saurare (GMT 11:30pm - 12:30pm)
Bayanai da Dumi-dumi
© China Radio International.CRI. All Rights Reserved.
16A Shijingshan Road, Beijing, China