A jiya Lahadi ne a birnin Urumqi aka rufe bikin baje koli na kasar Sin da kasashen Asiya da Turai karo na 5. Bikin baje kolin shi ne irinsa na farko da kasar Sin ta shirya, tun bayan da gwamnatin Sin ta mai da jihar Xinjiang a matsayin cibiyar zirin tattalin arziki ta hanyar siliki, wanda ya taka muhimmiyar rawa wajen inganta harkokin diplomasiyya a tsakanin kasar Sin da kasashen Asiya da Turai, da raya zirin tattalin arziki na hanyar siliki, da karfafa hadin gwiwa a tsakanin jihar Xinjiang da kasashen ketare, da kuma kara ilimantar da jama'a game da jihar Xinjiang.

A yayin bikin, an kulla jerin yarjejeniyoyin hadin gwiwa a fannonin tattalin arziki da ciniki, wadda darajarsu ta kai dalar Amurka biliyan 18, wadanda kuma suka shafi sana'o'in kimiyya da fasaha da aikin gona da hada-hadar kudi da sauransu.

Wannan bikin baje koli na kasar Sin da nahiyoyin Turai da Asiya ya kafa sabon tarihi a fannonin da suka shafi fadin wuri da yawan kayayyaki da aka baje da kuma yawan kamfannoni mahalartan bikin. A yayin bikin, an yi nasarar kulla kwangiloli 200 tare da kamfanonin jihar Xinjiang, wadanda yawan kudaden ya kai kudin Sin Yuan biliyan 241.2. Kana jimillar kudin cinikin da za a yi tare da kasashen waje zai zarce dalar Amurka biliyan 4.9.(Lami)